صفنت اعلى اسمك حركلي الاشواكـّ
طلعت حسرتي ابقهر ملفوفة
شوگ اوبلگلب ما ينحسب شوگ
وعليك اليوم كل اعضاي ملهوفه
يل مني رحت وي رمشت العين
انه بعدك صفيت اليوم سالوفه
عفتني بلا سبب لاعذر مشروع
موتدري العذول امحظره ادفوفه
يابير الوفه ياكاتم الاسرار
بيري اليوم كل اسراره مكشوفه
ماريد اليصبّر بيه بجفاك
ولانظرة عطف وي مدة اچفوفه
اريدك ذاك انته الفاتني وراح
اوجنت افرح حقيقة ابمرت اطيوفة
ذاك اللي ضحكته أتحرك الروح
وعلى المسمع كلامه أيصير معزوفة
اگلك انه بعدك صاير شلون؟؟؟
مثل سمچه اوعله النار مسگوفه
من شوگي الك احضنهه للروح
وذرعاني تظل عالجسد ملفوفه
والنوب الدمع هيجلي الجروح
يعاتبني ويكلي شلون منشوفة
يجرحي شلون اروفك گلي وتهيد
اذا خيط اليروفك رايد اتروفه
وانته من الالف للياء مجروح
خلص حته الكلام وضاعت حروفه
بحر الصبر ناشف والطريق بعيد
وقارورة صبرنه البيدي مزروفه
اصرخ ياحلم يل مايمر بيك
مو دايم چنت تتنطر اطيوفه
ياشمعة حياتي وسلوت الدار
يل رمشه غطاي ومخدتي اكتوفه
تلفت العين لجلك خاطر تعود
اليحب مثلك بشر مايگدر ايعوفه
صحيح انة حبك بس للكرامة حدود
ونة بلياك روحي تصير مخطوفة
أطش عمري نذر لو يوم رديت
وحق طف كربله والنجف والكوفه