الى والدي

يالزارع صبر بيامك الوكحات يل ذبلت عمرك وركه وركه
صبور وثوب صبرك مانزعته ابيوم وادري الوكت منك رايد ايشكه
كالو ننسى رسمك من تمر الايام طبع ينسى البشر لو طالت الفركه
بس بويه وحياتك صورتك للحين وسط الروح صدك هيه متعلكه
يمتعب الزمن من اجل ضحكه بيت وين المثل كلبك هسه مانلكه
وندور وين مثلك موهذيج الناس صفت هسه الحرامي ايطالب ابحكه
وندور وين مثلك عند كلب اجبير يبث بينه الحنان ابساعه الحركه
مانلكه احنه مثلك ياوسيع البال ضلينه ابغيابك روح مختنكه
كبل لمن نجيك ابشبكه نرتاح اجيناك هسه احنه ابحاجه الشبكه
طالت غيبتك مر مره لو بالطيف مربينا ترى ابحاجه اطيوفك
ندري بصحوه ماظن تلتكيك العين مبارك بالحلم خل عينه اتشوفك
علمنه الزمن نصبر نعوف اهواي بس كلشي انعوف وانته منعوفك
ياشايل جمر جبت العمر تعبان ومن تفتح اديك الخير بجفوفك
كبل تتلكه ضيفك بال هلا من الباب هسه الكبر هم بيه باب لضيوفك
يابويه اعلى بختك هالكلب محتار بعنه اصغار بويه ونرجه معروفك